Azərbaycan ATƏT PA-nın sessiyasından imtina etdi

Azərbaycan nümayəndə heyəti ATƏT Parlament Assambleyasının bu il noyabrın 18-20-də İrəvanda keçiriləcək payız sessiyasında iştirak etməyəcək.

Bu barədə Azərbaycanın ATƏT Parlament Assambleyasındakı nümayəndə heyətinin rəhbəri Azay Quliyev bildirib.

Onun sözlərinə görə, məsələ ilə bağlı ATƏT PA-da təmsil olunan nümayəndə heyətinə və qurumun beynəlxalq katibliyinə məktub ünvanlanıb. Məktubda Ermənistanda ölkəmizə qarşı hökm sürən düşmənçilik və anti-Azərbaycan təbliğatından narahatlıq ifadə olunub.

Qeyd edilib ki, cari il aprelin 14-də keçirilən beynəlxalq idman tədbiri zamanı bu ölkənin Baş naziri Nikol Paşinyanın gözləri önündə Azərbaycan bayrağına qarşı edilən hörmətsizlik və cinayət əməlini törədən şəxsin dərhal azad edilməsi Azərbaycan ictimaiyyətində haqlı narazılıq yaradıb.

“Beynəlxalq forumlarda bu cür əməlləri törədənlərin cəzasız qalması, qanunsuz olaraq həbsdə saxlanılan Azərbaycan hərbçilərinə qarşı qeyri-insani rəftar, sosial şəbəkələrdə azərbaycanlılara qarşı zorakılıq tədbirlərinin görülməsinə dair açıq çağırışlar Ermənistan dövləti tərəfindən dəstəklənən sistemli nifrət siyasətinin bariz nümunələrindəndir.

Azərbaycanın iştirak edə bilmədiyi sessiyada birtərəfli müzakirələrin nəticəsi faydasız və qəbuledilməz olmaqla yanaşı, ATƏT PA-nın Cənubi Qafqaz regionunda sülhü və barışığı təşviq etmək istiqamətində yürütdüyü parlament diplomatiyasına mənfi təsir göstərəcək”, – deyə məktubda bildirilib.

Məktubda o da qeyd edilib ki, payız sessiyası çərçivəsində Azərbaycanın maraqlarına zidd qəbul ediləcək istənilən qərar və ya tövsiyə etibarsız hesab olunacaq.