Casus yuvasına çevrilən Ermənistan region üçün təhdid yaradır

Dünyada ən böyük əraziyə sahib, yetmiş il ərzində öz varlığını yalnız hərbi güclə qorumağa çalışan SSRİ adlı imperiyanın süqutu bütövlükdə Qafqazı dünyanın ən qaynar bölgəsinə çevirib.

Kökündə Ermənistanın Azərbaycana qarşı əsassız ərazi iddialarının dayandığı regional gərginlik isə sosial problemlər məngənəsində inildəyən imperiyanın süqutunu sürətləndirdi. SSRİ-nin süqutundan sonra da bu iddialar bitmədi. İndi ermənilər Azərbaycan torpaqları ilə yanaşı, Türkiyənin şərqinə, Gürcüstanın Cavaxetiya bölgəsinə, Rusiyanın Stavropol diyarına, İranın Şərqi və Qərbi Azərbaycan vilayətlərinə də sahiblənmək xəyalından əl çəkmir.

Son dövrün hadisələri göstərir ki, Ermənistan özünü İrana yaxın göstərməklə ilk növbədə ABŞ-ni, İsraili və başda Böyük Britaniya olmaqla bəzi Avropa ölkələrini şantaj edir. Əslində isə real siyasi mənzərə tamamilə fərqlidir. Farsdilliliyi və radikallığı özünün dövlətçilik ideologiyası hesab edən molla rejimi İrəvanla yaxınlıq əlaqələrini nümayiş etdirməklə ilk növbədə Azərbaycanı təhdid edir.

Otuz illik erməni işğalı dövründə mövcud olan bu mövqe 44 günlük Vətən müharibəsində də dəyişmədi. Həqiqətdə isə terrorçu Ermənistan dünyanın ayrı-ayrı ölkələrinin xüsusi xidmət orqanlarının casus yuvasına çevrilib.