Erməni fəal: Bəzi qüvvələr Paşinyanı devirmək istəyir

“Azərbaycanın suveren ərazisində keçirilən istənilən hərbi aksiya 2 məsələyə: bu təxribatı törədənlərin məhvinə və real müharibəyə səbəb ola bilər”.

Bunu Baku TV-yə açıqlamasında erməni fəal İşxan Verdyan deyib.

“Bununla da beynəlxalq hüquq Azərbaycana əsas verir ki, ona qarşı nifrət bəsləyən ölkəni darmadağın etsin. Ermənistan hakimiyyəti bunu çox gözəl başa düşür. Bu səbəbdən hazırda onlar imkan verməzlər ki, şərti sərhəddəki Həkəri çayı ərazisində mülki şəxslərin sərhəd-buraxılış məntəqəsinə qarşı hansısa təxribat törədilsin. İrəvanda aksiya keçirən səlibçilər dəstəsinin bu iddiaları ölkədə stabilliyi pozmaq məqsədi daşıyır”, – deyə erməni fəal bildirib.

O qeyd edib ki, bütün bunlar əhali arasında nifrətin artırılmasına hesablanıb: “Bu revanşistləri idarə edən siyasi qüvvələr var, hansılar ki, Ermənistanın baş nazirini devirmək istəyirlər, çünki başa düşürlər ki, Paşinyan şərti sərhəddə hər hansı silahlı hərəkatın baş qaldırmasına imkan veməyəcək”.