Erməni separatçılara ABŞ-dən dəstək: 30 illik işğalı dəstəkləyən ikiüzlü ölkə

Ermənistanın Azərbaycana qarşı həyata keçirdiyi otuz illik işğal dövrü artıq geridə qalıb.

Müharibədən sonra işğaldan azad olunan ərazilərdəki vəziyyət erməni minnətçiliyinin əsl simasını dünyaya nümayiş etdirdi: işğal, vandalizm, narkotiklərin qanunsuz dövriyyəsi, terror düşərgələri və s.

İndi inkar olunmaz bir həqiqət ortadadır: otuz illik işğalda təcavüzkar Ermənistan Azərbaycana qarşı çoxşaxəli cinayətlərdə nə qədər məsuliyyət daşıyırsa, ona havadarlıq edən tərəflərin də beynəlxalq hüquq qarşısında eyni dərəcədə cavabdehliyi var. Burada ATƏT-in Minsk qrupunun məsulliyyəti xüsusilə ağır və konkretdir. Lakin təəssüf ki, ATƏT-in Minsk qrupu mövcud olduğu dövrdə heç bir faydalı iş görmədi. Bu qrupun həmsədri kimi ABŞ da öz növbəsində bu və ya digər şəkildə ikili standartlar nümayiş etdirdi. Bölgəyə davamlı olaraq turist səfərləri edən həmsədrlər işğala məruz qalan Azərbaycan ilə işğalçı Ermənistana eyni münasibət bəsləməklə təcavüzkar tərəfi qanunsuz fəaliyyətinə həvəsləndirdilər. Əsasən işğalçı tərəfin maraq və mənafelərinə xidmət edən bəyanatlar səsləndirildi.

ATƏT-in Minsk qrupu və onun həmsədrlərindən biri olan ABŞ uzun illər münaqişənin dondurulmuş vəziyyətdə qalması üçün əlindən gələn hər şeyi etdi. Qarabağdakı qondarma rejimə hər il minatəmizləmə adı altında milyonlarla dollar yardım verildi. Xankəndidəki xunta rejimi isə bu adla aldığı vəsaitin bir hissəsini Ermənistandakı mina zavodlarına köçürərək böyük sayda yeni minalar aldı və minalanmış sahələri daha da genişləndirdi.

Xankəndini özünə terror bunkeri seçən separatçılar davamlı olaraq ABŞ-yə səfər edərək “Qarabağa yardım” adı altında vəsait topladılar. ABŞ-nin müxtəlif şəhərlərində saxta marafonlar keçirib separatçı rejim üçün böyük məbləğdə pullar topladılar. Məhz ABŞ-də Qarabağdakı cinayətkar rejimin ofisi yaradıldı, rejimin nümayəndələri Amerikaya səfər edərək ayrı-ayrı səviyyələrdə görüşlər keçirdilər. Üzdə Azərbaycanın ərazi bütövlüyünə dəstək ifadə olunsa da, arxada Ermənistan və Qarabağdakı separatçı rejimə dəstək verildi. Sadaladığımız faktlar ATƏT-in Minsk qrupunun keçmiş Qarabağ münaqişəsindən əvvəl tarixə qovuşmasına səbəb oldu.