Ermənidən çox erməni olan senat iş başında

Rəsmi Paris öz məkrli siyasəti ilə ürək bulandırmaqda davam edir.

Fransa Senatı bu dəfə də ermənidən çox erməni olmağı seçərək Ermənistanı dəstəkləyən və Azərbaycana qarşı olan yeni qətnamə qəbul edib.

Sənəddə ölkəmizin ötən ilin sentyabrında Qarabağda həyata keçirdiyi lokal xarakterli antiterror tədbirləri pislənilib, ölkəmizə qarşı Avropada sanksiya rejiminin tətbiqi təklif edilib. Qətnamədə hətta Ermənistanın müdafiəsini təmin etmək üçün Fransa tərəfindən hər növ vasitələrlə təmin edilməsi də öz əksini tapıb.

Xatırladaq ki, bu, ölkəmizə qarşı atılan ilk belə addım deyil. 2022-ci ilin payızında da Fransa oxşar tələblərlə çıxış edib. O zaman da Senatda Azərbaycana qarşı sanksiyaların tətbiqini, Silahlı Qüvvələrimizin guya Ermənistan ərazisindən dərhal çıxarılmasını tələb edən qətnamə qəbul edilib.

Məlumat üçün bildirək ki, sözügedən sənəddə ermənilərin qayğısına qalaraq Nikol Paşinyan hökumətinə də çağırış müddəası da yer alıb. Qeyd olunub ki, rəsmi İrəvan Azərbaycanın iqtisadi zonası olan Qarabağı könüllü tərk edən ermənilərə qucaq açmalı, onlara mənzil, səhiyyə və təhsil baxımından dəstək verməlidir. Fransa bu təşəbbüsdə Ermənistan hakimiyyətinə yardım etməyə hazır olduğunu da qeyd edib.

Fransa Senatı özü də qərəzli mövqeyini hiss edərək ikili oyun oynadığını dolayı yolla etiraf edib. Palata üzvləri bildiriblər ki, qətnamənin hökumət üçün məcburi əhəmiyyəti yoxdur, bu sadəcə parlamentarilərin istəyinin və ya narahatlığının ifadəsidir.