Ermənistan siyasi arenasında yer yerindən oynayacaq?

Ermənistanın revanşist və rusiyapərəst müxalifəti Zəngəzur dəhlizi ətrafında manipulyasiyaları qızışdırır.

Buna misal kimi, Ermənistanın birinci prezidenti olmuş Levon Ter-Petrosyanın jurnalistlərə “Sünik üçün böyük təhlükələr görürəm” açıqlamasını göstərmək olar.

Eks-prezidentin bu açıqlaması cəmiyyətdə panika və qeyri-müəyyənlik yaratmağa yönəlib. Robert Koçaryan-Serj Sarkisyan rejiminin hakimiyyət illərində onlara qarşı olan müxalifətə rəhbərlik edən Levon Ter-Petrosyan indi öz mövqeyini dəyişərək keçmiş düşmənləri ilə çiyin-çiyinə verib Nikol Paşinyana qarşı döyüşməyə başlayıb.

Onun bir zamanlar dəstəklədiyi N.Paşinyana qarşı çıxışlar etməsinin əsl səbəbi siyasi qısqanclıqdır. Levon Ter-Petrosyan yaşının çoxluğuna baxmayaraq, hələ də hakimiyyət xəyalı ilə yaşayır. Əsas məqsəd növbəti parlament seçkilərinədək nüfuzunu artırmaqdır. Yəni Levon Ter-Petrosyanın səsləndirdiyi fikirlər yeni deyil.

Maraqlıdır ki, keçmiş prezident və onun həmfikirləri bu məsələ ilə bağlı konkret faktları açıqlamırlar. Sadəcə, məsələni “dəhşətli” adlandıraraq N.Paşinyana olan etimadı sarsıtmağa, Azərbaycan və Ermənistan arasında razılaşdırılmış sülhün tam əldə edilməsinə mane olmağa çalışırlar.

Məsələnin daha bir maraqlı tərəfi isə Zəngəzur dəhlizi əleyhinə Ermənistanda əks-təbliğat aparan qüvvələrin əsasən Rusiyaya bağlı olmasıdır. Levon Ter-Petrosyanın onların sırasına qatılması isə tarixin ironiyasıdır. Bir vaxtlar Moskvanın dəstəyi ilə hakimiyyətdən devrilən sabiq prezident indi yenidən siyasi revanş üçün Kremldən mədət umur.