Ermənistan Türkiyə ilə münasibətlərin normallaşdırılmasını nə üçün istəyir? | Detallar açıqlandı

Ermənistan ilk növbədə iqtisadi səbəblərdən Türkiyə ilə münasibətlərin normallaşmasında maraqlıdır.

Bunu rusiyalı politoloq Sergey Markov deyib.

“Nikol Paşinyan Ermənistan cəmiyyətinə göstərmək istəyir ki, ölkəsi ilə Azərbaycan və Türkiyə arasında yaxınlaşma prosesi dönməzdir. Bu baxımdan sözügedən səfər Ankaranın İrəvanı Bakı ilə Azərbaycan şərtləri əsasında sülh müqaviləsi imzalamağa sövq etməsi baxımından faydalıdır.

Türkiyənin Ermənistana təklif edəcəyi əsas amillər iqtisadi blokadanın tamamilə aradan qaldırılması, nəhəng Türkiyə iqtisadiyyatının erməni biznesinin üzünə açılması, Türkiyə sərmayəsinin Ermənistanda mümkünlüyü, sərhədlərin açılması və diplomatik münasibətlərin bərpasıdır”, – o bildirib.

S.Markovun sözlərinə görə, Ermənistanla münasibətlər Azərbaycan üçün əsas mövzulardan biridir:

“Azərbaycan liderinin Türkiyəyə səfəri zamanı yəqin ki, həm İlham Əliyev, həm də Rəcəb Tayyib Ərdoğan Ermənistanla bağlı ortaq mövqeni müzakirə edib və formalaşdırıb. N.Paşinyanın Ermənistanı Azərbaycana və Türkiyəyə yaxınlaşdırmaq üçün etdikləri İrəvan üçün faydalıdır, Ermənistana yeni inkişaf sahəsi açmağa imkan verəcək. Bu, təkcə Ermənistan sakinləri üçün deyil, həm də nəhəng erməni diasporunun nümayəndələri üçün iqtisadi inkişaf imkanları açacaq”.