Fərid Şəfiyev: Azərbaycan həm Rusiya, həm də Qərblə üzləşir

Hər zaman olduğu kimi, Ermənistanın "TIR şousu"nda da Qərb fərqli mövqe nümayiş etdirir. Azərbaycana qarşı ikili münasibət sərgiləyir.

Məsələn, 2014-cü ildə Ukrayna işğal altında olan Donetskə humanitar yardım aparmaq istəyəndə ərazidəki separatçılar bu təklifi geri çevirərək Rusiyaya üz tutmuş, Qərb isə bunun yalnız rəsmi Kiyev vasitəsilə baş tutacağını bildirmişdi. Amma eyni hadisə Qarabağda da baş versə də, bu dəfə separatçıların hay-küyü nəzərə alınır. Rəsmi Bakı saxta iddialarla ittiham olunur. Yaxşı, əgər mövzu, həqiqətən də, separatizmə qarşı mübarizədirsə, necə olur ki, Qərb dairələri Donetskə ayrı, Qarabağa fərqli münasibət sərgiləyir?

Təbii ki, Qarabağ separatçılarının Ukraynadakılardan heç bir fərqi yoxdur. Amma Qərb cəbhəsi bu məsələdə də ikili standartdan çıxış edir, qanunsuz dəstələri nədənsə ikiyə ayırır. Halbuki separatizmə dəstək və başqa ölkənin daxili işinə qarışmaq beynəlxalq hüququn pozulmasıdır.

Millət vəkili Ceyhun Məmmədovun sözlərinə görə, türk və müsəlman olmağımız bu prosesdə öz sözünü deyir: “Əslində isə gözlənilən o idi ki, yanaşma belə olmasın. Azərbaycan bu gün beynəlxalq hüquqla təsbit olunmuş ərazilərində öz vətəndaşlarına sahib çıxmağa hazırdır. Bizim kənardan heç bir dəstəyə ehtiyacımız yoxdur. Bu, Qərbin ikili standartlarının, qərəzli yanaşmasının növbəti təzahürüdür”.