Gürcüstan üçün "sağ qalmaq günü" yaxınlaşır | Qərb və Rusiya arasında mübarizə

Müxtəlif dövrlərdə ayrı-ayrı ölkələrin seçki prosesinə kənar müdaxilələrlə bağlı iddialar səslənir.

Məsələn, son prezident seçkilərində ABŞ Rusiyanı seçkiyə müdaxilədə ittiham edib.

Eləcə də ölkənin Federal Təhqiqatlar Bürosu respublikaçı namizəd Donald Trampın prezidentlik kampaniyasını hədəf alan haker hücumunun arxasında İranın dayandığı qənaətinə gəlib.

Avropa İttifaqının xarici siyasət idarəsinin rəhbəri Cozep Borrelin mətbuat katibi isə bu ilin martında Rusiyada keçirilən prezident seçkiləri ilə bağlı bildirib ki, müasir Rusiyada azad, ədalətli və demokratik səsverməni təsəvvür etmək çətindir.

İndi həmin Qərb Gürcüstanda yaxınlaşan seçkilərdən danışır. Bu ölkədə oktyabrın 26-na təyin edilən parlament seçkiləri Qərb və Rusiya arasında nüfuz uğrunda mübarizə meydanına çevrilib. Qalmaqallı “Xarici agentlər haqqında” qanunun gərginliyi indi də parlament seçkilərinə ötürülüb.

Siyasi şərhçi Elşad Mirbəşiroğlu bildirib ki, Qərb dövlətləri, xüsusilə də ABŞ açıq işarələr verməkdədirlər ki, parlament seçkilərini Gürcüstanda dövlət çevrilişi üçün imkan kimi nəzərdən keçirirlər:

“Həqiqətən də, Gürcüstanda 25 mindən çox QHT mövcuddur və onlar xaricdən gələn maliyyə ilə öz fəaliyyətlərini qurmaqdadır. Əslində, onlar Qərbin Gürcüstandakı bələdçisi rolunda çıxış edir. Qərbi də qıcıqlandıran odur ki, Gürcüstandakı agentlər şəbəkəsini itirməkdədir”.