Hikmət Hacıyev aşkarlanan kütləvi məzarlıqdan yazdı

Ermənistan Xocalı soyqırımına və Azərbaycana qarşı törədilmiş digər qanunsuz hərəkətlərə görə dövlət olaraq məsuliyyət daşıyır.

Bu barədə Prezidentin köməkçisi Hikmət Hacıyev "X"sosial şəbəkə hesabında yazıb.

Xocalıda növbəti kütləvi məzarlıq aşkar edildiyini bildirən Prezidentin köməkçisi qeyd edib ki, bu, ilahi ədalətdir ki, 1992-ci il fevralın 26-da törədilmiş Xocalı soyqırımının növbəti ildönümündə bu adsız və günahsız mülki qurbanların qalıqları tapıldı. Hikmət Hacıyev onların kimliyinin DNT analizi ilə müəyyən ediləcəyini bildirib.

“Ermənistanın hərbi təcavüzü nəticəsində dörd minə yaxın azərbaycanlı itkin düşmüş hesab olunur. Ermənistan kütləvi şəkildə qətlə yetirilən azərbaycanlıların dəfn olunduğu belə kütləvi məzarlıqların yeri barədə məlumatı verməkdən imtina edir.

Bir dövlətin beynəlxalq hüquqa zidd olan hər bir hərəkəti beynəlxalq hüquqa uyğun olaraq həmin dövlətin beynəlxalq məsuliyyətinə əsas verir. Ermənistan Respublikası 30 illik hərbi işğala və xüsusilə də Xocalı soyqırımına görə Azərbaycan xalqından və dövlətindən hələ də üzr istəməyib”, – deyə Prezidentin köməkçisi Hikmət Hacıyev sosial şəbəkə hesabında bildirib.