İrəvan mediasının məkrli Qarabağ planı

“Qarabağ həmişə İrəvandakı iğtişaşların təşkilatçılarının maraqlarına xidmət etmək üçün alət olub”.

Bu sözləri erməni bloger Natali Aleksanyan özünün “Facebook” səhifəsindəki paylaşımında yazıb.

O qeyd edib ki, bu gün erməni kütləvi informasiya vasitələri qərəz dolu məlumatlar yaymaqla məşğuldur.

“Əgər böyük erməni kütləsi indi tamamilə azərbaycanlıların nəzarəti altındadırsa, o zaman erməni mediası özünü necə aparmalıdır? Erməni mediası hər şeyi saxta və dezinformasiya ilə doldurmalıdır ki, azərbaycanlılar tamamilə qəzəblənsin və ermənilərdən qisas alsınlar. Bu gün erməni mediası bu xəstə məntiqlə işləyir. Ermənistanda boş-boşuna “Artsax Artsax” şüarları qışqıran avaraların mediası formalaşıb. Bu erməni mediası İrəvanı dağıtmağa, Qarabağ erməniləri arasında terror törətməyə və azərbaycanlıları qəzəbləndirməyə çalışır ki, Bakı ermənilərə qarşı mümkün qədər qəddar olsun.

Xanımlar və cənablar, özünüzü kənardan gördünüzmü? Davranışlarınız çox iyrəncdir. Sizin üçün Qarabağ həmişə vasitə olub. Sizin maraqlarınıza xidmət etməkdən imtina edirəm. Qarabağ ermənilərini şikar kimi görməniz məni hiddətləndirir. Mən sizinlə eyni şəhərdə yaşamaqdan nifrət edirəm”, – deyə erməni bloger öz paylaşımında yazıb.