Koloniyalardan gələn gəlirlərdən kasıb ölkələrə çatan pay

Yeni Kaledoniyanın paytaxtı Noumea şəhərində keçirilən növbəti etiraz mitinqi təkcə onun iştirakçılarının başqa bayraqlarla yanaşı, Azərbaycan bayrağını da qaldırmaları ilə yox, həm də azərbaycanlı jurnalist Aygün Həsənovanın ölkədən deportasiyası ilə də yadda qalıb.

Özünü “demokratik ölkə” kimi təqdim edən ölkədə media nümayəndəsinə qarşı bu qədər qeyri-adekvat münasibətin səbəbi sadə idi: jurnalist Azərbaycandan gəlmişdi və ona qarşı neqativ münasibət yalnız Fransanın Ermənistana qarşı bacılıq duyğularından qaynaqlanmırdı.

Məhz Azərbaycanın sədrliyi dövründə Qoşulmama Hərəkatı dünyanın neokolonializmə qarşı çıxan ən məşhur platformalarından birinə çevrildi. Fransa müstəmləkəçiliyinə qarşı Bakı Təşəbbüs Qrupunu yaradan da məhz bu Hərəkatın nümayəndələri idi və oktyabrın sonunda “Neokolonializm: insan hüquqlarının pozulması və ədalətsizlik” mövzusunda konfrans keçiriblər. Onun işində Yeni Kaledoniyanın, eləcə də bir çox keçmiş və indiki Fransa müstəmləkələrinin – Əlcəzair, Mali, Mərakeş, Qvadelupa, Martinik, Fransız Qvianası və Fransız Polineziyasının nümayəndələri iştirak ediblər.

Bundan başqa, Prezident İlham Əliyev konfrans iştirakçılarına müraciətində Beşinci Respublikanın nüvə sınaqları keçirdiyi müstəmləkələrə dəymiş ziyanın qiymətləndirilməsi ilə bağlı beynəlxalq təşkilatların çağırışlarını dəstəkləyib.

Bakı forumunda Kaledoniya İttifaqının baş katibinin müavini Devid Vanabo da iştirak edib və bildirib ki, Yeni Kaledoniya “buxovlardan xilas olaraq” öz siyasi kursunu seçmək istəyir.

Bundan əlavə, noyabrın 21-də isə Bakıda daha bir konfrans keçirildi – “Dekolonizasiya: Qadınların hüquq və imkanlarının artırılması”.

Yeni Kaledoniya nümayəndələri dəfələrlə qeyd ediblər ki, Fransa Yeni Kaledoniyanın müstəmləkəçiliyə uğramış ölkələr siyahısından çıxarmaq üçün hər yola əl atır və onlar yalnız Azərbaycanın sayəsində nüfuzlu bir platforma kimi Qoşulmama Hərəkatı vasitəsilə öz səslərini dünya ictimaiyyətinə çatdıra biliblər. Məhz burada onlar müstəqilliklə bağlı təkrar referendumun keçirilməsi üçün beynəlxalq ictimaiyyətin dəstəyini ala biliblər.