Müxalif deputatlar Paşinyanın müttəfiqini "atəşə tutdu" | Debat zamanı qalmaqal

Ermənistanın hakim Mülki Müqavilə Partiyasından Gümrüdəki mer seçkisində namizəd olan Sarik Minasyan martın 28-də Qarabağla bağlı səsləndirdiyi ifadəyə görə müxaliflər tərəfindən tənqidə məruz qalıb.

Erməni mediası yazır ki, S.Minasyanı tənqidlərə tuş gətirən onun debatlar zamanı dediyi “Qarabağ pis yer idi” sözləri olub.

Belə ki, debat zamanı S.Minasyanın opponentlərindən biri Ruben Mxitaryan Baş nazir Nikol Paşinyanı tənqid edib. Daha sonra deyib ki, o, Qarabağı Azərbaycana “Qarabağ Ermənistandır” deyəndən bir neçə il sonra satdı.

Buna cavab olaraq S.Minasyan “keçmiş prezidentlər Robert Köçəryan və Serj Sərkisyan dövründə Qarabağ elə pis yer idi ki, insanlar orada xidmət etməmək üçün Gümrüdə pul ödəyirdilər” deyib.

“İcbari hərbi xidmət keçməsi üçün oğulları Qarabağa aparılan şəxslər özlərini bədbəxt hesab edirdilər”.

Bu sözlər iki namizəd arasında gərginliyi artırıb və nəticədə, moderator debatın yayımını yarımçıq dayandırmalı olub.

S.Minasyanın sözləri Ermənistanda bir çoxlarının, o cümlədən Qarabağdakı keçmiş rejimin nümayəndələrinin tənqidinə səbəb olub. Hazırda İrəvanda yaşayan Qarabağdakı separatçı rejimin keçmiş ombudsmanı Artak Belaryan S.Minasyanın sözlərinin N.Paşinyanın səylərinə uyğun olduğunu deyib.

Ermənistanın müxalif Şərəf Duyuram Blokundan deputat Tiqran Abramyan isə S.Minasyanın səsləndirdiyi fikirlərlə “siyasi intihar” etdiyini bildirib.

S.Minasyan ilk dəfə deyil qalmaqalla gündəmə gəlir. Keçən ayın sonu o, Azərbaycanın Qarabağda nəzarəti N.Paşinyana görə yox, ermənilərin vuruşmadığı üçün bərpa etdiyini demişdi. Bu, S.Minasyana qarşı tənqidlərə səbəb olmuşdu.