Politoloqlar eksklav ərazilərimizin qaytarılmasından danışdı

Vətən müharibəsindən sonra Azərbaycan və Ermənistan danışıqlar prosesinə daxil olmaqla qarşılıqlı etimad quruculuğuna start verib.

Prosesdə iki il ərzində müəyyən problemlər olsa da, ötən il dekabrın 7-də Azərbaycan Prezident Administrasiyası və Ermənistan Baş naziri aparatı arasında hər hansı vasitəçi olmadan qəbul edilən birgə bəyanat iki ölkə arasında irəliləyişlərin əldə edilməsinə təkan verib.

Bu uğurların davamı isə aprelin 19-da Ermənistanın işğalda saxladığı 4 kəndi Azərbaycana qaytarması olub. Bu isə onu deməyə əsas verir ki, tərəflər arasında daha da irəliyə getmək üçün gözlənilən baza formalaşmaqdadır və bu baxımdan növbəti mərhələ eksklav ərazilərimizin azad edilməsidir.

Lakin Ermənistanın işğal etdiyi əraziləri həqiqi sahiblərinə qaytarması həm revanşist erməniləri hərəkətə gətirib, həm də İrəvan üzərindəki xarici təzyiqləri artırıb və ölkədə yeni aksiyalara rəvac verib. Aydındır ki, mövcud hakimiyyətə edilən təzyiqlər Nikol Paşinyanı sülh prosesindən yayındırmağa hesablanıb, halbuki regionun sabitliyi sülh müqaviləsinin imzalanmasından keçir.

Eksklav əraziləri geri qaytarmaq üçün həm də beynəlxalq təcrübədən istifadə etmək olar. Bunun üçün isə ərazilərlə bağlı bütün detallar hesablanmalı və bunun üzərindən danışıqlar prosesi ilə bağlı yeni mərhələyə start vermək lazımdır.