Qalstanyan İranın xüsusi xidmət orqanlarından göstərişlər alıb? | Sensasion təfərrüatlar

15-16 fevral 2024-cü il tarixlərində “Daşnaksütyun” partiyasının “Hay Dat” komitəsi İranın paytaxtı Tehran şəhərində “Hay Dat” bu gün Artsaxın itirilməsi, milli böhran, Ermənistanın öz dövlətçiliyini və suverenliyini qorumaq uğrunda mübarizəsi” adlı tədbir keçirib. Burada Tavuş yeparxiyasının yepiskopu Baqrat Qalstanyan da iştirak edib və çıxış edib.

Bu barədə “Кавбюро”nun araşdırmasında qeyd olunub.

Çıxışı zamanı o, “Milli birlik vasitəsilə Artsax şəhidlərinin yarımçıq qalmış işlərinin tamamlanmasının vacibliyini” vurğulayıb. Əvvəllər o, açıq şəkildə özünü revanşist adlandırırdı.

Tədbir zamanı bir çox yerli daşnaklar, o cümlədən Ermənistanın İrandakı səfiri Arsen Avaqyanın başçılıq etdiyi erməni diplomatlar ön sırada Tavuş vilayətinin yepiskopu Baqrat Qalstanyanın ətrafına toplaşıblar.

Yəni Tavuşda yolun bağlanmasında İranın izləri varmı?

Araşdırma zamanı məlum olub ki, erməni yepiskopu B.Qalstanyanın İslam İnqilabının 45-ci ildönümündə İrana səfərini təsadüfi saymaq olmaz.

O, yəqin ki, “iranlı ev sahiblərini qarşılamağa” gəlib, inqilabın ildönümünün qeyd edilməsində iştirak edib, onları təbrik edib. Onun İranda olarkən İranın xüsusi xidmət orqanlarından göstərişlər alması və onların göstərişi ilə hərəkət etməsi diqqətdən kənarda qala bilməz.

İranın Ermənistandakı səfiri, ölkəmiz əleyhinə çıxışları ilə tanınan Mehdi Sübhani son müsahibəsində erməni jurnalistin anklavların Azərbaycan Respublikasına verilməsi ilə bağlı sualını cavablandırarkən çox məyus görünüb. Güvəndiyi Baqrat kimi adamlar, yəqin ki, planlarını tam reallaşdıra bilməyiblər.