"ABŞ ilə münasibətlərimizə zərbə vuranlar..." | Hikmət Hacıyevdən mühüm açıqlamalar - Baku TV

Donald Tramp Administrasiyası Azərbaycanın sülh gündəliyinə sadiqlik nümayiş etdirib.

Bunu Prezidentin köməkçisi Hikmət Hacıyev "The Washington Times" qəzetinə deyib.

Hikmət Hacıyev 907-ci düzəlişin mövcudluğunun sülhə qarşı işlədiyini bildirib:

"Hər iki hökumət – Azərbaycan və Ermənistan sülhü möhkəmləndirmək üçün gərgin iş aparır. Lakin Konqresdə bəziləri tamamilə lazımsız və ayrı-seçkilik toxumları olan qanunvericilik aktları təqdim edirlər".

Hikmət Hacıyev Bayden-Blinken administrasiyasının Azərbaycan-ABŞ münasibətlərinə zərbə vurduğunu da bəyan edib.

O qeyd edib ki, Donald Trampın dövründə istiləşən ABŞ-Azərbaycan münasibətləri əvvəlki administrasiyanın yanaşması ilə kəskin təzad təşkil edir:

"Bayden və Blinken administrasiyası ilə təəssüf ki, çoxlu anlaşılmazlıqlar var idi və onlar münasibətlərə çox ziyan vurdular".

O xatırladıb ki, Bayden administrasiyası Əfqanıstan missiyası bitdikdən dərhal sonra 907-ci maddə məhdudiyyətlərini yenidən tətbiq edib.

Hikmət Hacıyev D.Tramp Administrasiyası ilə pozitiv əməkdaşlıq nümunəsi kimi onun birinci prezidentliyi dövründə Administrasiyanın Cənub Qaz Dəhlizi layihəsi vasitəsilə Xəzər qazının Avropa bazarına çatdırılmasında həlledici rol oynadığını xatırladıb.

Azərbaycanın Ermənistanla iqtisadi münasibətlər qurma cəhdlərinə toxunan Hikmət Hacıyev bu ölkəyə neft məhsullarının ixracını, Ermənistan bazarlarına taxıl tranzitinə yaradılan şəraiti qeyd edib.

"Bu, simvolik görünə bilər, lakin simvolizmlə yanaşı, həqiqətən də, mühüm geosiyasi çalarlar var. Biz sülhü təkcə Ermənistan hökuməti ilə deyil, həm də Ermənistan xalqı ilə qururuq", – deyə Hikmət Hacıyev bildirib.

"Bizdə yəhudi, xristian və müsəlman icmaları əsrlərdir ki, yanaşı yaşayırlar. Bu bizim ənənəmiz, kimliyimizdir. Bizim sülh gündəliyimiz üçün daha güclü qətiyyətimiz var və biz D.Tramp Administrasiyasının tam dəstəyinə malikik", – deyə Prezidentin köməkçisi qeyd edib.