Rəsmi Bakı separatçı rejimi çıxılmaz vəziyyətə salıb

Azərbaycanın yaratdığı reallıq, proseslərə etdiyi diqtə, Ermənistanın havadarlarının təzyiqlərini dəf etməsi Qarabağdakı separatçıları çıxılmaz vəziyyətə salıb.

Artıq son çırpıntılarını yaşayan və çıxılmaz vəziyyətin şokundan bir-birinə qənim kəsilən kriminal ünsürlər Araik Arutyunyanın canına qəsd etməkdən belə çəkinmir, çarəsizlik fonunda kütləvi aksiyalara start verirlər. Bunun nəticəsidir ki, A.Arutyunyan artıq qondarma rejimin taleyi ilə bağlı yekun qərar verəcəyini də açıqlayıb. Bu isə onların dalana dirəndiyini, dolayısı ilə ya təslim olub Azərbaycanın şərtlərini qəbul edəcəyini, ya da ki, ərazilərimizi tərk edəcəyini göstərir.

A.Arutunyan və əlaltıları da başa düşürlər ki, Azərbaycanın suveren ərazilərində onun iradəsindən kənar heç nə baş verə bilməz. Yəni azad edilən digər ərazilər kimi, Xankəndidə də Azərbaycanın yurisdiksiyası bərpa ediləcək. Çünki Qarabağdakı dinc erməniləri girovuna çevirən və onlar üzərindən siyasi manipulyasiyalar edən separatçılar başa düşürlər ki, Azərbaycan vətəndaşı olmaq istəyən ermənilərin sayı hər keçən gün artır, qanunsuz silahlı birləşmələrin rəhbərliyindən cavab tələb edilir.

Araikə və tərəfdarlarına qarşı artan etirazlar, Azərbaycanın Qarabağ ermənilərinə çağırışları, dinc sakinlərin isə əsarətdən qurtulmaq cəhdləri göstərir ki, Qarabağın dinc erməni əhalisi artıq kriminal rejimdən cana gəlib. Bu isə o deməkdir ki, Azərbaycan ərazilərində separatizmin kökü tezliklə kəsiləcək. Çünki mövcud şərtlər buna çoxdan zəmin yaradıb.