Rusiya İrəvanın düşməni adlandırıldı | Ermənistana hərbi yardımlar davam edir

Ermənistan uzun müddətdir qapılarını Qərb dairələrindən gələn nümayəndələrin üzünə taybatay açıb.

Gələnlər bu tribuna vasitəsilə Rusiyaya barmaq silkələyib, erməni xalqına dəstək mesajları verərək gözlərinə kül üfürür.

İrəvana növbəti səfəri isə Fransanın xarici işlər naziri Stefan Sejurne edib.

Nazir ənənəyə sadiq qalaraq Ermənistandan Rusiyaya qarşı tənqidi fikirlər səsləndirib. O, ölkəsinin Ermənistanı Moskvadan qoruyacağını bildirib, hətta bir qədər irəli gedərək Rusiyanı İrəvanın düşməni adlandırıb. Ölkəsində demokratik dəyərləri tapdalamaqda ittiham olunan Fransanın hazırkı hakimiyyəti Ermənistana demokratiya gətirəcəyini vəd edib.

Fransalı nazir təkcə Rusiyaya mesaj göndərməklə kifayətlənməyib. O, dolayı yolla Azərbaycana da mesaj ünvanlayıb. S.Sejurne Parisin İrəvanla müdafiə sahəsində əlaqələri daha da dərinləşdirmək niyyətlərini təsdiqləyib və əlavə edib ki, Ermənistan öz əhalisini qorumağı bacarmalıdır.

Avropa və ABŞ-nin hər vəchlə Ermənistanı dəstəkləmək yolunda atdığı addımlar, əslində, sülhə vurulan bir zərbədir. Diqqətlə baxsaq, aydın görmək olar ki, Ermənistan bu dəstəyi arxalarına aldıqdan sonra daha cəsarətli davranışlar sərgiləməyə başlayıb. Xüsusilə müdafiə sahəsindəki yardımlar Azərbaycanı məcbur edir ki, yaranmış vəziyyətə səssiz qalmasın. Danışıqların səssizləşdiyi yerdə isə təəssüf ki, qaba güc işə düşür.