Rusiyalı politoloq Paşinyanın Rusiyaya qarşı çıxmasını şərh etdi

Ermənistanın Baş naziri Nikol Paşinyan “Politico” nəşrinə müsahibəsində bildirib ki, Azərbaycanla açıq münaqişəyə qayıtmaq qorxusu artsa da, İrəvan təhlükəsizliyin təminatçısı kimi artıq Moskvaya arxalana bilməz.

N.Paşinyanın sözlərinə görə, bir zamanlar Qafqazda özünü polis kimi göstərən Rusiya artıq nüfuzunu və super dövlət statusunu itirib. Məhz buna görə də köhnə müttəfiq Rusiyadan əl çəkərək Qərbə daha da yaxınlaşmağın zəruriliyini vurğulayıb.

Rusiyalı politoloq İqor Korotçenko məsələni Baku TV-yə şərh edib və bildirib ki, Nikol Paşinyanın bu hərəkətləri Ermənistanın sonunu daha da yaxınlaşdırır:

“Ermənistan hakimiyyəti siyasi dairələrdə xüsusən də son aylar ərzində Rusiyaya qarşı açıq-aşkar şəkildə qeyri-dostluq münasibəti nümayiş etdirir. Biz görürük ki, Ermənistanın Baş naziri Nikol Paşinyan fəal şəkildə müxtəlif liderlərə zəng edir, Azərbaycan və Moskva ilə qarşıdurmada İrəvana siyasi dəstək istəyir. Belə bir şəraitdə Rusiya tərəfi İrəvanın bütün son qeyri-dost davranışlarına sərt reaksiya verdi. Vəziyyət hətta o dərəcəyə çatdı ki, Ermənistanın Moskvadakı səfiri nazirliyə çağırıldı və ona etiraz notası verildi. Eyni zamanda hazırkı Rusiya-Ermənistan münasibətlərini şərh edən Prezident Vladimir Putin kifayət qədər təmkinlə bildirdi ki, Rusiya Ermənistan kimi müttəfiqlərini itirməkdən qorxmur. Müəyyən problemlər var ki, onları həll etmək lazımdır, lakin onlar dialoq yolu ilə həll edilməlidir. Təəssüflər olsun ki, V.Putinin bu sözlərindən sonra İrəvan hələ də lazımi addımlar atmayıb. Hesab edirəm ki, Ermənistanın bütün səhvlərinin düzəldilməsi üçün N.Paşinyan Moskvaya rəsmi səfər etməlidir. O, Ermənistan hakimiyyətinin son təxribat xarakterli, qeyri-dost bəyanatlarına görə Rusiya Prezidenti ilə danışıqlar aparmalıdır”.

İ.Korotçenko əlavə edib ki, Rusiya Prezidenti Vladimir Putin də Qarabağın Azərbaycanın ayrılmaz hissəsi olduğunu təsdiqləyib və bildirib ki, Nikol Paşinyanın Moskvaya qarşı səsləndirdiyi bütün ittihamlar yalnız özünə ünvanlanmalıdır. Çünki Ermənistan hakimiyyəti rəsmi səviyyədə Qarabağı Azərbaycanın ərazisi kimi tanıdıqdan sonra əlavə şərhə ehtiyac qalmır.