Şuşa Bəyannaməsi Azərbaycan və Türkiyəni rəsmən qardaşlaşdırdı

Ümummilli lider Heydər Əliyevin tarixlərə işıq salan “Bir millət, iki dövlət!” kəlamı əsasında inkişaf dinamikasında olan Azərbaycan-Türkiyə münasibətləri Şuşa Bəyannaməsinin müddəaları ilə müttəfiqlik səviyyəsinə yüksəlib. Ötən iki il ərzində bu tarixi sənədlə bağlı geniş şərhlər verilsə də, haqlı olaraq belə bir sual gündəmdədir: Şuşa Bəyannaməsi regionda nəyi dəyişdi?.

Əvvəla qeyd etmək lazımdır ki, birinci dünya müharibəsinin nəticələrinə uyğun olaraq uzun illər məcburi şərtlər çərçivəsində müstəqilliyini qoruyan qardaş ölkə Türkiyə təxminən bir əsr sonra yenidən Cənubi Qafqaza qayıdıb. Azərbaycanın müstəqilliyi, yürüdülən düzgün və azad siyasət, çoxşaxəli inkişaf, ölkədəki milli birlik və s. mühüm elementlər bu xoşmissiyalı qayıdışı təmin etdi.

Şuşa Bəyannaməsi regionda sülh, əmin-amanlıq, bölgə ölkələrinə kompleks inkişaf vəd edən, müstəqillik əldə olunandan bəri iki qardaş ölkənin ərazi bütövlüyü çərçivəsində imzalanan ilk tarixi beynəlxalq statuslu sənəddir.

Bəyannamənin Prezident İlham Əliyev və Türkiyə Prezidenti Rəcəb Tayyib Ərdoğan tərəfindən Qars müqaviləsinin şərtləri çərçivəsində, Azərbaycanın Milli Qurtuluş Günündə imzalanması öz-özlüyündə tarixi ədalətin və beynəlxalq hüququn təsdiqidir.

Sənədin beynəlxalq əhəmiyyətinə gəldikdə qeyd etməliyik ki, Azərbaycan və Türkiyə bütün qonşu ölkələrlə münasibətlərini mehriban dostluq və səmimi qonşuluq, dövlətlərin sərhəd toxunulmazlığı prinsipləri əsasında qurur. Ölkələrin ərazi bütövlüyünü tanımaq, xalqların birgəyaşayışına təminat vermək bütün tərəflərin beynəlxalq ictimaiyyət qarşısında götürdüyü öhdəlikdir.

Şuşa Bəyannaməsi regional proseslərin məhz bu prinsiplər əsasında inkişafına zəmanət verən beynəlxalq sənəddir.