Vardanyan Xankəndidən çıxa bilmir

İllərdir Rusiyada çirkli pulların dövriyyəsi ilə məşğul olmaqla milyardlara sahib olan erməni əsilli Ruben Vardanyan minlərlə erməninin yaşadığı Xankəndidə mətbuat konfransı keçirib.

Avropa ölkələrinin Rusiyaya qarşı tətbiq etdiyi sanksiyalardan qorxaraq vətəndaşlıqdan imtina edib Xankəndidə separatçılıq etmək eşqinə düşən R.Vardanyan tam təcrid vəziyyətində olduğunu, Qarabağdan çıxa bilmədiyini deyib.

O bildirib ki, Azərbaycanın hüquq-mühafizə orqanları sərhəddə Qarabağa girib-çıxan erməniləri yoxladıqlarından Xankəndidən çıxa bilmir. Helikopterlə çıxmaq istəsə də, onu da edə bilmədiyini deyib. Çünki azərbaycanlıların helikopteri vuracağından ehtiyat etdiyini bildirib.

Sualları cavablandıran R.Vardanyan Ermənistan hökumətinin son açıqlamalarından narahat olduğunu və Nikol Paşinyanın istədiklərinə boyun əyməyəcəklərini vurğulayıb.

“Ermənistan hakimiyyəti başa düşməlidir ki, Qarabağın taleyini ölkəyə nəzarət edən yalnız bir qrup insanlar həll edə bilməz”, – deyə R.Vardanyan əlavə edib.