Yeni Kaledoniyadakı qəbilə Fransanın bu hərəkətlərinə susmadı | Əhali ayağa qalxdı

Yeni Kaledoniyadakı Saint-Luis qəbiləsi Fransa hökumətinin vəhşiliklərinə etiraz əlaməti olaraq məhkəmə müraciəti yayıb.

Müraciətdə deyilir ki, 2024-cü il 13 may tarixindən, Yeni Kaledoniyadakı indiki hadisələrin başlanğıcından etibarən Fransa bu uzaq ərazidə köhnə müstəmləkə kabusunu yenidən canlandırmağa başlayır.

“Dövlətin adanın cənubundakı Mont-Dore kommunasında yerləşən Saint-Louis qəbiləsinə münasibəti təəssüf ki, Əlcəzair müharibəsi zamanı yerli əhaliyə qarşı edilən rəftarı xatırladır. Heç bir xəcalət çəkməyən dövlət qeyri-mütənasib güc münasibətinə baxmayaraq, zərərsizləşdirilməli və susdurulmalı olan 1200 cinayətkarla iş aparırmış kimi davranır”, – deyə müraciətdə qeyd edilib.

Bildirilir ki, bu qəbilənin üç övladı Fransa Milli Jandarması güllələrinin altında can verib.

“Sanki qəbiləmizin ətrafında Sakit Okeanın Berlin divarını tədricən yüksəldirlər. Torpaqlarımız blokadaya alınıb, əhalimiz aclıq çəkir və gənclərimiz öldürülür”, – deyə Saint-Luis qəbiləsi bəyanatında vurğulanır.

Qəbilə nümayəndələri bildirirlər ki, onlar artıq yerli məhkəmədən heç nə gözləmirlər.

“Ona məcburən müraciət edirik, amma onun ədalətsiz qərarları güclüləri qoruyur, zəifləri əzir və bizi anlaşılmazlığın dibinə salır. Burada qurbanlar dövlət tərəfindən təşkil olunan bir propaqanda vasitəsilə cəllad kimi təqdim edilir və beləliklə, müstəmləkə nizamını qorumağa çalışırlar.

Əgər Saint-Luisdəki hazırkı sistem dövlətin bütün ərazini nəzarətdə saxlama iddiası üçün bir “qəza testi” kimi təsvir edilirsə, bilsin ki, bütün bu qəbiləni şəhid etməsi, bəlkə də, Kanak müstəqillik arzusunu boğmaqdan daha asan olacaq”, – deyə bəyanatda qeyd olunur.