Beynəlxalq dekolonizasiya cəbhəsi Bujival razılaşmasını qəbul etmədi

Beynəlxalq Dekolonizasiya Cəbhəsi Bujival razılaşmasına dair rəsmi mövqeyini bildirib. Beynəlxalq Dekolonizasiya Cəbhəsi bu razılaşmanın kanak xalqının öz müqəddəratını təyinetmə hüququnun tam və səmərəli həyata keçirilməsi, eləcə də beynəlxalq hüququn məcburilik prinsiplərinin tam etibarlılığının təmin olunması məsələlərində dərin narahatlıqlarını ifadə edib.

Qeyd edək ki, Fransa və Kanaki siyasi qüvvələri arasında imzalanmış razılaşma Yeni Kaledoniyanın statusu ilə bağlı yeni siyasi çərçivəni müəyyən edir və ərazinin Fransanın tərkibində qalması şərti ilə “Yeni Kaledoniya dövləti” kimi xüsusi statuslu muxtar qurum kimi tanınmasını nəzərdə tutur.

Razılaşmaya əsasən, Kanaki sakinləri həm fransız, həm də yeni yaradılacaq “Kaledoniya vətəndaşlığı”na malik olacaqlar. Bundan əlavə, sənəd dövlətin suverenlik hüququnun mərhələli şəkildə genişləndirilməsi, xüsusilə müdafiə, təhlükəsizlik və digər sahələrdə dövlət səlahiyyətlərinin tam ötürülməsi kimi məsələləri ehtiva edir.

Bununla yanaşı, razılaşmanın qüvvəyə minməsi üçün 2026-cı ildə Yeni Kaledoniyada keçirilməsi nəzərdə tutulan referendumun müsbət nəticəsi vacib şərtdir.

Beynəlxalq Dekolonizasiya Cəbhəsi qəti şəkildə qeyd edir ki, Yeni Kaledoniyanın statusu Fransa daxilində məhdud muxtariyyət çərçivəsində deyil, öz müqəddəratını təyinetmə hüququna əsaslanan tam suveren dövlət statusunda müəyyən edilməlidir.