Zaxarovadan erməni jurnalistə şillə kimi cavab: Qərbin məqsədi nədir?

“Azərbaycanın Qranadada planlaşdırılan görüşdə iştirak etməmək qərarı onun suveren hüququdur”.

Bunu Rusiya Xarici İşlər Nazirliyinin (XİN) rəsmi nümayəndəsi Mariya Zaxarova bildirib.

“Öz mövqeyini və siyasətini müəyyən etmək hər bir ölkənin suveren hüququdur. Söhbət bizim iştirak etmədiyimiz görüşdən gedir. Ona görə də tərəflərin qərarını şərh etməyi lazım görmürəm. Üstəlik, Bakı bütün addımlarına mütəmadi olaraq izah gətirir və informativ şəkildə şərh edir. Hesab edirəm ki, bu cür suallar Azərbaycan tərəfinə ünvanlanmalıdır, ya da sadəcə onların şərhini gözləmək lazımdır. Bütövlükdə prosesə gəlincə, Ermənistan-Azərbaycan münaqişəsinin həllində Rusiyanın vasitəçi kimi həyata keçirdiyi rol hər kəsə məlumdur. Daha sonra isə Qərb tərəfdaşları işə qarışaraq öz mənfəətlərini axtarmağa, yaranmış vəziyyətdə öz xeyirlərini güdməyə başladılar. Onlar həmişə başqalarının əldə etdiyi ahəngi pozmaqda maraqlıdırlar”, – o vurğulayıb.

Xatırladaq ki, Azərbaycan Prezidenti İlham Əliyev Avropa İttifaqı, Fransa və Almaniya liderlərinin iştirakı ilə Ermənistanın Baş naziri Nikol Paşinyanla görüşün keçirilməli olduğu İspaniyaya getməkdən imtina edib. Buna səbəb nəzərdə tutulan beştərəfli görüşdə iştirakçı olan Fransanın destruktiv mövqe tutması, eləcə də Paris və Berlinin Türkiyənin görüşdə iştirak etməsi ilə bağlı fikir ayrılığıdır.