“ChatGPT” sınaqdan keçirildi | Araşdırmaların nəticəsi açıqlandı

İsrail və Böyük Britaniyadan olan beynəlxalq alimlər qrupu süni intellekt əsaslı böyük dil modellərinin yaşlandıqca idrak qabiliyyətlərinin azalmasını sübut ediblər.

Araşdırma “The BMJ” elmi jurnalında dərc olunub.

Komanda “ChatGPT”, “Gemini” və digər məşhur “chatbot”ları Monreal İdrak Qiymətləndirmə Testi (MoCA) ilə sınaqdan keçirib. Bu test adətən insanlarda Altsheymer xəstəliyi və ya demensiya kimi idrak pozğunluqlarını müəyyən etmək üçün istifadə olunur. Test diqqət, yaddaş, dil bacarıqları, vizual qavrayış və icra funksiyaları ilə bağlı tapşırıqları özündə cəmləşdirir.

Nəticələr göstərib ki, neyron şəbəkələr bəzi tapşırıqların öhdəsindən yaxşı gəlir, lakin keçmişi xatırlama ilə bağlı çətinlik çəkir. Məsələn, “ChatGPT”nin son versiyası 30 baldan 26 bal toplayaraq insan üçün normal göstərici əldə edib. Daha köhnə versiya olan “Gemini 1.0” isə cəmi 16 bal toplayaraq mümkün “idrak zəifləməsi”ni büruzə verib.

Araşdırmanın müəllifləri qeyd edirlər ki, onların nəticələri müşahidə xarakteri daşıyır və süni intellekt ilə insan ağlı arasında birbaşa müqayisə kimi qəbul edilə bilməz. Lakin onlar xəbərdarlıq edirlər ki, aşkar edilən zəifliklər süni intellektin klinik tibdə, xüsusilə vizual abstraksiya və icra funksiyaları tələb edən tapşırıqlarda tətbiqini ləngidə bilər.