13 yaşında ana olan qız ailəsinə qaytarıldı | Azyaşlı ilə evlənən gənc necə cəzalandırıldı?

13 yaşında ana olan azyaşlı ailəsinə qaytarılıb.

Ağcabədi rayonunda 2010-cu il təvəllüdlü yeniyetmənin valideynləri polis şöbəsinə dəvət olunaraq, onlarla profilaktiki söhbət aparılıb.

Daxili İşlər Nazirliyinin Mətbuat Xidmətinin regional qrupundan bildirilib ki, qız valideynlərinin himayəsinə təhvil verilib.

Xatırladaq ki, 13 yaşlı qızın 23 yaşlı oğlandan hamilə olması ilə bağlı xəbər yayılıb.

Məlumata görə, ailələrin razılığı ilə qızın 18 yaşı tamam olanda rəsmi nikah olacaqmış. Nişan məclisində qızın hamilə olduğu məlum olub və ailələr evdə yaxın qohumların iştirakı ilə toy məclisi də təşkil ediblər.

Hamilə olan qız xəstəxanaya müayinəyə gedən zaman həkimlər bu barədə polisə məlumat veriblər. Buna qədər ailələr məsələni gizli saxlamağa çalışıblar. Faktla bağlı cinayət işi açılıb.

Məhkəmə istintaqı dövründə onların övladları dünyaya gəlib. Zərərçəkmiş kimi tanınan 13 yaşlı qız və ailəsi şikayətçi olmayıblar. Onların övladlarının dünyaya gəlməsi də yüngülləşdirici hal kimi nəzərə alınıb.

Məhkəmənin hökmü ilə şərti adı Şəhriyar olan şəxs barəsində şərti cəza təyin edilib. Həbsdə olan Şəhriyar azadlığa buraxılıb və barəsində polis nəzarətinə verilmə qətimkan tədbiri seçilib.