6 noyabr Azərbaycanda radio və televiziya işçilərinin peşə bayramı günüdür

Noyabrın 6-sı Azərbaycanda televiziya və radio işçilərinin peşə bayramıdır.

Düz 98 il öncə, 1926-cı il noyabrın 6-da Azərbaycanda ilk dəfə radio yayımına başlanılıb. Həmin gün ilk dəfə Bakı küçələrində “Danışır Bakı” ifadəsi eşidilib.

1956-cı il fevralın 14-də Azərbaycan Televiziyası yaranandan sonra isə bu tarix ölkədə teleradionun yaranma günü kimi qeyd olunmağa başlayıb.

Televiziyanın ilk efirinə çıxan mərhum sənətkar Nəcibə Məlikova bu dəfə “Göstərir Bakı” deyib. Həmin gün televiziyada “Bəxtiyar” bədii filmi nümayiş etdirilib.

1997-ci ildən FM diapazonunda radio yayımına başlanılıb. 2016-cı ildə isə ölkədə televiziyaların analoq yayımı dayanadırılıb və rəqəmli teleyayıma keçid edilib.

Hazırda Azərbaycanda onlarla ümumrespublika, regional, kabel, internet, peyk televiziya və radiosu fəaliyyət göstərir. Artıq televiziya və radio sahəsində bir çox yeniliklərə imza atılıb.

Belə ki, rəqəmsal media hazırda insanlar üçün ən operativ şəkildə informasiya əldə etmə rolunu oynayır. Əlimizdəki telefonlardan evimizdəki televizorlara qədər rəqəmsallaşmış mühitdə informasiyanı daha operativ əldə edirik.

Hər zaman ən isti xəbərləri dəqiq, qərəzsiz çatdırmalı olduğumuz bu yolda Baku TV ailəsi bütün media nümayəndələrinə uğurlar diləyir.