7 yaşlı Fəridin qətlindən təfərrüatlar | Hökm oxundu

Sumqayıt şəhərində məşq zamanı 7 yaşlı uşağı öldürməkdə təqsirləndirilən idmançı Mehman Xəlilova hökm oxunub.

Sumqayıt Ağır Cinayətlər Məhkəməsinin hakimi Fəhmin Hümbətovun sədrliyi ilə keçirilən son prosesdə idmançı 19 il azadlıqdan məhrum edilib.

İttihama görə, 2023-cü il aprelin 29-da Sumqayıt şəhər prokurorluğuna 2016-cı il təvəllüdlü Fərid Bakarovun Şəhər Uşaq Xəstəxanasında ölməsi barədə məlumat daxil olub.

İlkin araşdırma zamanı 1994-cü il təvəllüdlü Mehman Xəlilovun Sumqayıt şəhəri ərazisində yerləşən məktəblərdən birində cüdo idman növü üzrə keçirilən məşq zamanı Fərid Bakarova xəsarətlər yetirməsi nəticəsində onun həmin xəsarətlərdən ölməsinə əsaslı şübhələr müəyyən edilib.

Mehman Xəlilov ilkin olaraq Cinayət Məcəlləsinin 120.2.4 – xüsusi amansızlıqla və ya ümumi təhlükəli üsulla adam öldürmə maddəsi ilə təqsirli bilinib.

Daha sonra ona Cinayət Məcəlləsinin 120.2.9 – təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə maddəsi ilə ittiham irəli sürülüb.