“ADNA terroru”ndan 15 il ötür | Dəhşətli hadisədə nələr yaşandı?

Keçmiş Azərbaycan Dövlət Neft Akademiyası, indiki Azərbaycan Dövlət Neft və Sənayə Universitetində törədilən terror hadisəsindən 15 il ötür.

2009-cu il aprelin 30-da səhər saatlarında ali təhsil müəssisəsinin 2-ci korpusuna daxil olan Gürcüstan vətəndaşı, 1980-ci il təvəllüdlü Fərda Qədirov binanın 1-ci mərtəbəsindən 6-cı mərtəbəsinədək qarşısına çıxan hər kəsə “Makarov” tipli tapançadan atəş açıb. O, 12 nəfəri öldürüb, 13 nəfəri isə yaraladıqdan sonra özünü də öldürüb.

Faktla bağlı Cinayət Məcəlləsinin terrorçuluq, qəsdən adam öldürmə, qaçaqmalçılıq, qanunsuz olaraq odlu silah, döyüş sursatı əldə etmə, saxlama, daşıma və gəzdirmə və qanunsuz olaraq narkotik vasitələri əldə etmə, saxlama və daşıma maddələri ilə cinayət işi açılıb.

Hüquq-mühafizə orqanlarının apardığı araşdırmadan sonra məlum olub ki, terror aktı törədən Fərda Qədirov erməni xüsusi xidmət orqanlarının sifarişini yerinə yetirib.

İstintaq materiallarına görə, o, Gürcüstan vətəndaşı Mardun Qumaşyan adlı erməni ilə mütəmadi əlaqədə olub. Hətta hadisəni törətmək üçün ona silah və külli miqdarda pul verilib. Mardun Qumaşyan barəsində İnterpol vasitəsilə həbsli axtarış elan edilib.

Törədilən kütləvi qətllə əlaqədar işə Ağır Cinayətlər Məhkəməsində baxılıb. Nəticədə Cavidan Əmirov, Nadir Əliyev, Arif Qabulov və Nəcəf Süleymanov cəzalandırılıblar. Onlardan Arif Qabulov 11 il müddətinə, digərləri isə ömürlük azadlıqdan məhrum ediliblər.