Ağadadaş Ağayev bu dəfə zərərçəkən qismində | Məhkəmədə nələr yaşandı?

Xalq artisti Ağadadaş Ağayevin balta atdığı tibb mərkəzinin mühafizəçisi Nurəddin Cəlilovun məhkəməsi baş tutub.

Binəqədi Rayon Məhkəməsində baş tutan ilk iclasda tərəflərin anket məlumatları dəqiqləşdirilib, ilkin dinləmələr keçirilib. Bu dəfə iclasda iş üzrə Ağadadaş Ağayev zərərçəkən şəxs kimi iştirak edib.

Onun vəkili Asim Abbasov vəsatət qaldıraraq sərbəst mühakimə edilən Nurəddin Cəlilovun həbs edilməsini istəyib. Vəkil vəsatətini Cəlilovun şahidlərlə eyni müəssisədə işlədiyini və onlara təsir edə biləcəyi ilə əsaslandırıb.

Hakim Elçin Ağayev onun vəsatətini təmin etməyib. Qərara alınıb ki, mühafizəçi də məhkəməyə birbaşa evdən gəlsin. İş üzrə məhkəmə baxışı dekabrın 25-nə təyin olunub.

Qeyd edək ki, insidentə görə cinayət işləri ayrı-ayrılıqda icraata götürülüb. Digər işdə isə Xalq artisti Ağadadaş Ağayev təqsirləndirilən şəxsdir. Onların hər ikisi Cinayət Məcəlləsinin 221.3-cü (xuliqanlıq – silah qismində istifadə olunan əşyalardan istifadə etməklə törədildikdə) maddəsi ilə ittiham olunur.