AQTA məlumat yaydı | köhnəlmiş məhsulları satan marketlə bağlı hansı qərar verildi?

Bir neçə gün bundan əvvəl Baku TV olaraq paytaxtın “Tarqovı” adlanan mərkəzi küçəsində yerləşən marketlərdən birində aşkarladığımız vaxtı keçmiş məhsullarla bağlı ictimaiyyəti məlumatlandırmışdıq.

Problem ictimailəşdikdən dərhal sonra Qida Təhlükəsizliyi Agentliyi məsələ ilə bağlı araşdırma aparıb və ictimaiyyətə geniş açıqlama ilə çıxış edib:

“Bakıda fəaliyyət göstərən marketlərdən birində satılan dovğa məhsullarının istifadə müddətlərinin bitməsi ilə bağlı mediada yayılan məlumat əsasında Qida Təhlükəsizliyi Agentliyi tərəfindən araşdırma aparılıb. Qeyd olunan qida məhsullarının Bakı şəhəri, Nəsimi rayonu, Əlimərdan Bəy Topçubaşov küçəsi, ev 346 ünvanında yerləşən, fiziki şəxs Salmanov Elman Ağaxan oğluna məxsus “Okean” marketdə satışının həyata keçirildiyi müəyyən edilib. Bununla əlaqədar olaraq, Agentliyin müfəttişləri həmin marketdə plandankənar yoxlama aparıb.

Yoxlama zamanı ticarət obyektinin satış vitrinində kütləvi informasiya vasitələrində yayılan yararlılıq müddəti bitmiş dovğa məhsullarına rast gəlinməyib. Buna baxmayaraq, aparılan yoxlama zamanı satışda olan digər qida məhsullarının da yararlılıq müddətinə baxış keçirilib. Baxış zamanı son istifadə müddəti bitmiş “Buva” əmtəə nişanlı 9 ədəd 0,33 litrlik qazsız təbii mineral su və digər məhsullar aşkar edilib. Yararlılıq müddəti bitmiş məhsullar dərhal satışdan kənarlaşdırılıb.

Yuxarıda qeyd edilənlərlə əlaqədar olaraq, ticarət obyektinin rəhbərliyinə qida məhsullarının satışı zamanı yararlılıq müddətinin daimi nəzarətdə saxlanılması ilə bağlı ciddi xəbərdarlıq olunub. Eyni zamanda, aşkar olunan uyğunsuzluqlarla bağlı market rəhbərliyi barəsində inzibati xəta haqqında protokol tərtib edilib”.

Agentlikdən o da bildirilib ki, qurum əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini bundan sonra da davam etdirəcək, istehlakçı hüquqlarının pozulmasına yönələn qanunsuz halların qarşısı qətiyyətlə alınacaq.