Atamın adından yalandan imza çəkdirmişdilər... | Məmməd Əlilinin yaxınları xatirələrini bölüşdü

“Retro Baku”nun yeni buraxılışı rejissor və aktyor Məmməd Əlilinin xatirəsinə həsr olunub.

Məmməd Əlili İçərişəhərdə kasıb ailədə doğulmuş, uşaqlıq illərində müxtəlif işlərdə çalışaraq ailəsinə dəstək olmuşdur. Onun həyatı Cəfər Cabbarlı ilə tanışlıqdan sonra tamamilə dəyişib. C.Cabbarlı onu məktəbə və teatra gətirib, aralarında illərlə davam edən səmimi dostluq yaranıb.

1932-ci ildə Moskvada teatr sahəsində təcrübə qazanan M.Əlili rejissorluq sənətində peşəkarlaşmağa başlayıb. “Dənizi fəth edənlər” filminin çəkilişi zamanı həyatını riskə ataraq əsl şücaət nümayiş etdirib. O, Neft Daşlarında aylarla qalaraq dəniz mövzusunda filmlərin ərsəyə gəlməsində mühüm rol oynayıb.

Dostu Aydın Kazımzadənin sözlərinə görə, bir dəfə C.Cabbarlı onu evinə qonaq çağırıb. Sonradan evdə pulların itməsi ilə bağlı vəziyyət gərginləşib. C.Cabbarlı pulların azaldığını deyərək onu oğurluqda ittiham edib. Lakin sonradan məlum olub ki, bu hadisə C.Cabbarlının yazdığı obraz üçün qurduğu psixoloji təcrübə imiş.