Azərbaycanlı alim müharibənin taleyini bu kəşflə dəyişdi | Vaqif Abbasovdan açıqlama

İkinci Dünya müharibəsində faşizm üzərində qələbənin əldə olunmasında Azərbaycan elminin əvəzsiz töhfələri olub.

Xüsusilə azərbaycanlı alim Yusif Məmmədəliyevin “Molotov kokteyli” kəşfi müharibənin bitməsində çox böyük rol oynayıb.

Neft-Kimya Prosesləri İnstitutunun baş direktoru Vaqif Abbasovun sözlərinə görə, “Molotov kokteyli” əsasən ağır texnikaların yandırılaraq partladılmasına xidmət edən bir silah növüdür:

“Müharibə vaxtı çox geniş istifadə olunurdu. Yerüstü texnikaların sıradan çıxarılmasında, xüsusilə yaxın məsafədən tətbiq olunan ən effektiv vasitələrdən biri idi”.

Faşizm üzərində qələbədə Azərbaycanın rolu bununla da bitmir. Almanların ən çox çəkindiyi “Katyuşa” raketlərinin istehsal olunduğu müəssisələrdən biri də Bakıda yerləşirdi. Hərbi ekspert Şair Ramaldanov bildirib ki, “Katyuşa”nın istehsalına 1941-ci ildə başlanılıb:

“Bu silah saniyədə iki mərmi atmaq qabiliyyətinə malik idi. Hər mərminin çəkisi 22 kiloqram, döyüş başlığı isə təxminən 5 kiloqram olub. “Katyuşa”lar müharibənin sonuna qədər düşməndən gizli saxlanılıb və almanların əlinə keçməməsi üçün zəruri hallarda məhv edilirdi”.