“Bütün bazarın “otxod”u buradadır!” | Kanalizasiya xəttini zibilliyə çevirənlərin ifşası - Baku TV

Son günlər müşahidə olunan intensiv yağışlar şəhərin kanalizasiya sisteminin işində ciddi çətinliklər yaradıb. Yağıntıların normadan artıq olması ilə yanaşı, sistemin məişət tullantıları ilə yüklənməsi vəziyyəti daha da gərginləşdirir. Problemin əsas səbəblərindən biri bazarlarda balıq, toyuq və meyvə-tərəvəz qalıqlarının birbaşa kanalizasiya xətlərinə atılmasıdır.

Lakin məsuliyyətsiz yanaşma yalnız bazarlarla məhdudlaşmır. Bəzi vətəndaşların məişət tullantılarını kanalizasiya sisteminə atması həm yağışlı, həm də adi hava şəraitində xətlərin tıxanmasına gətirib çıxarır.

Mövcud vəziyyətlə bağlı Xətai Rayon Sukanal İdarəsinin şöbə rəisi Əli Məhərrəmli bildirib ki, təmizlik işləri zamanı rast gəlinən mənzərə dəhşət doğurur:

“Biz tez-tez kanalizasiya baxış quyularına paltar, buşlat, uşaq bezləri və salfetlərin atıldığının şahidi oluruq. Hətta baxış quyularından inək kəlləsi, qəssablar tərəfindən kəsilib atılan heyvan dəriləri çıxarırıq. Bütün bunlar sistemin tamamilə sıradan çıxmasına və ciddi tıxanmalara yol açır. Vəziyyətin ciddiliyini nəzərə alaraq binaların giriş hissələrinə, bloklara xəbərdarlıq elanlarının yapışdırılmasını planlaşdırırıq. Məqsədimiz vətəndaşlara kanalizasiya sisteminə zibil qutusu kimi baxmamalı olduqlarını xatırlatmaqdır”.