Camaatın başına tökülsə, biabırçılıqdır... | Pirşağı sakinləri çarəsiz vəziyyətdə qaldı

Sabunçu rayonu, Pirşağı qəsəbəsi, Ağa Əlizadə küçəsinin sakinləri iki problemdən şikayət edirlər.

Onlardan biri evlərə suyun dolması ilə bağlıdır.

Sakinlər bildiriblər ki, məsələ ilə bağlı aidiyyəti qurumlara müraciət etsələr də, problem həllini tapmayıb.

“Hər dəfə yağış yağanda əziyyət çəkirik. Evin altı suyun içindədir. Buna görə hasar da çöküb, camaatın başına tökülsə, fəlakət olacaq”, – deyə sakinlərdən biri narazılığını ifadə edib.

Problemlə bağlı İri Şəhərlərin Birləşmiş Su Təchizatı Xidmətindan bildirilib ki, tullantı su şəbəkəsinə qoşulmaq üçün vətəndaş tələb olunan sənədləri “ASAN Kommunal” xidmətinə təqdim etməlidir.

Sakinlərin sözlərinə görə, digər problem evlərinin yaxınlığında açılan zavoddan qaynaqlanır:

“Rezinin qoxusundan evdə oturmaq olmur, sağlamlığa ziyandır, dəfələrlə özlərinə də demişəm. Yaxınlıqdakı torpaqların hamısını alıblar, mən də ortada qalmışam. Nə evimdə yaşaya bilirəm, nə də sata”.

Hüquqşünas Hikmət Əliyevin sözlərinə görə, zavodun fəaliyyəti nəticəsində, yəni onun təqsiri səbəbindən mülkiyyətçiyə hər hansı zərər dəyibsə, yaxud da zavodun fəaliyyət istiqaməti mülkiyyətçinin qanunla qorunan maraqlarını, hüquqlarını pozursa, belə olan halda şəxs ona dəymiş maddi və mənəvi zərərin ödənilməsi, hüquqlarını pozan hərəkətlərin aradan qaldırılması barədə məhkəmədə iddia qaldıra bilər.