Cərimə meydançasında illərdir sahibini gözləyən avtomobillər - Baku TV

Cərimə meydançalarında illərlə sahiblərini gözləyən avtomobillər var.

Bu nəqliyyat vasitələri inzibati qayda pozuntuları və ya hüquqi prosedurlar səbəbindən polis əməkdaşları tərəfindən saxlanılaraq müvəqqəti duracaqlara yerləşdirilir. Lakin bəzi hallarda sahiblər avtomobillərini geri götürmədiyi üçün onlar uzun müddət cərimə meydançalarında qalır.

Maraqlıdır, belə hallarda həmin avtomobillərlə bağlı hansı addımlar atılır?

Məsələ ilə bağlı nəqliyyat üzrə ekspert Elməddin Muradlı bildirib ki, xarici təcrübədə avtomobil sahibi müəyyən müddət ərzində nəqliyyat vasitəsini cərimə meydançasından götürmədikdə, avtomobil dövlətin balansına keçirilir. Azərbaycanda isə qaydalar fərqlidir.

Ekspertin sözlərinə görə, bəzi sürücülər mövcud vəziyyətdən sui-istifadə edirlər:

“Qanunvericiliyə əsasən, cərimə meydançasında saxlanılan hər bir avtomobil üçün gündəlik ödəniş hesablanır. Avtomobil sahibi iki seçim qarşısında qalır: ya sənədləri qaydaya salaraq maşını götürür, ya da imtina ərizəsi yazaraq nəqliyyat vasitəsindən imtina edir. Bu halda avtomobil aidiyyəti qurumlara təhvil verilir”.

Baş Dövlət Yol Polisi İdarəsinin Baş inspektoru Elvin Hacıyev isə bildirib ki, belə avtomobil sahibləri ilə dəfələrlə əlaqə saxlanılıb və onlara rəsmi məktublar göndərilib:

“Təəssüf ki, hələ də bu məsələyə laqeyd yanaşan şəxslər mövcuddur. Avtomobillərin duracaqdan götürülməsi və ya utilizasiyaya təqdim edilməsi üçün bütün şərait yaradılıb. Müraciət edən şəxslərə dərhal köməklik göstərilir. Əsas məqsəd ölkənin avtomobil parkının yenilənməsi, ekoloji normalara cavab verməyən və ya tam yararsız vəziyyətə düşmüş nəqliyyat vasitələrinin utilizasiyaya yönləndirilməsi, həm təhlükəsizliyin artırılması, həm də ətraf mühitin qorunmasıdır”.

Qeyd edək ki, Tarif Şurasının 12 aprel 2006-cı il tarixli qərarına əsasən, Baş Dövlət Yol Polisi İdarəsinin nəzdində fəaliyyət göstərən duracaqlara gətirilən avtomobillərin gündəlik saxlanma haqqı çəkisinə görə müəyyən edilir.

Belə ki, 3,5 tona qədər olan avtomobillərin 1 günlük saxlama qiyməti 1 manat, 3,5 tondan 10 tona kimi olduqda 2 manat, 10 tondan yuxarı olduqda isə 3 manatdır. Minimum 3,5 tonluq avtomobilin 3 ilini hesabladıqda isə bu, min manatdan çox pul edir.