Ceyranbatan sakini nənə və nəvə dəhşət yaşadı | Hamısı quduz itlərdir...

Ceyranbatan qəsəbəsi, Gündüz Abdullayev küçəsinin 28-ci binasında yaşayan sakinlər küçə itləri ilə bağlı ciddi narahatlıq keçirirlər.

Onlar Baku TV-nin qaynar xəttinə müraciət edərək məsələ ilə bağlı aidiyyəti qurumlardan kömək istəyiblər.

Yaxın günlərdə qəsəbədə baş verən hadisə narahatlığın əsassız olmadığını bir daha göstərib.

Belə ki, sakinlərdən biri – Rəfiqə Hüseynova küçə itlərinin hücumuna məruz qalıb.

“Nəvəmlə mağazaya gedirdik. Uşaq dedi ki, it var. Birdən üstümə hücum etdi, qolumdan dişlədi. Burada küçə itləri çoxdur. Şükürlər olsun ki, nəvəmin üstünə cummadı, yoxsa özümü bağışlaya bilməzdim”, – deyə zərərçəkən bildirib.

Məsələ ilə bağlı Ceyranbatan qəsəbə inzibati ərazi dairəsi üzrə nümayəndəlikdən bildiriblər ki, itlərin daşınması ilə bağlı onların heç bir səlahiyyəti yoxdur. Ayda bir dəfə quduzluq əleyhinə vaksin vurulur.

Bakı Şəhər İcra Hakimiyyətindən isə qeyd edilib ki, sahibsiz heyvanlar üçün publik hüquqi şəxs yaradılır. Məqsəd sahibsiz heyvanlara xidmət göstərmək və bu sahədə olan nöqsanları aradan qaldırmaqdır.