Deputat saxtakarlığı belə ifşa etdi | Gənclərin həyatını belə alt-üst edirlər!

“Müəyyən dövlət qulluğuna qəbul üzrə müsahibələr formal xarakter daşıyır”.

Bunu Milli Məclisin İctimai birliklər və dini qurumlar komitəsinin sədri Fazil Mustafa Hesablama Palatasının illik hesabatının müzakirəsi zamanı deyib.

Deputat bildirib ki, həm müsabiqənin müsahibə mərhələsində, həm də ehtiyat kadrların təyinat mərhələsində kifayət qədər çatışmazlıqlar var:

“Bunun kökündə dayanan əsas məsələ müqaviləli işçi himayədarlığı problemidir. Orqan rəhbərlərinin belə qanunsuzluqlara cəhd etmələrinin əsas məqsədi saxta və qeyri-leqal yollarla xüsusi tanış və tapşırıqla vəzifələri ələ keçirən müqaviləli şəxsləri saxlamaqdır. Təssəvvür edin ki, şəxs müsabiqədə qalib gəlir, ən yüksək bal taplayır, amma müsahibədə müqaviləli şəxslərə uduzur. Ömrünü dövlət qulluğunda yer almağa həsr etmiş bir vətəndaş bu mərhələni aşa bilmir.

Ehtiyat kadrların təyinatı məsələsində iki illik müddət yenidən nəzərdən keçirilməlidir. Dövlət İmtahan Mərkəzinə səlahiyyət verilsin ki, harada vakansiya varsa, gənclər həmin vəzifələrə göndərilsin”.