Dərnəgül bazarı köçürülür? | Sahibkarlara xəbərdarlıq edildi

Tikinti materiallarının satışının həyata keçirildiyi Dərnəgül bazarı söküləcək.

Bu barədə artıq sahibkarlara da məlumat verilib.

Bildirilir ki, bazar yeni ünvanda, Lökbatan qəsəbəsində “Abşeron” Ticarət Mərkəzində fəaliyyət göstərəcək.

Baku TV bazarın sökülməsi və köçürülməsi ilə bağlı bazar rəhbərliyi ilə əlaqə saxlayıb. Bildirilib ki, bu barədə onlarda hər hansı bir məlumat yoxdur.

Qeyd edək ki, bir neçə gün əvvəl Baş nazir Əli Əsədov Bakı şəhərinin sosial-iqtisadi inkişafı istiqamətində strateji əhəmiyyətli şəhərsalma təşəbbüslərinin dəstəklənməsi üzrə İşçi qrupun yaradılması barədə sərəncam imzalayıb.

İşçi qrup tərəfindən Böyükşor gölü ətrafında, Heydər Əliyev və Ziya Bünyadov prospektləri arasında yerləşən ərazilərin, Heydər Əliyev adına Neft Emalı Zavodu ətrafında olan ərazilərin dövlət-özəl tərəfdaşlığı modeli çərçivəsində razılaşdırılmış konseptual layihələr əsasında yenidən qurulmasının həyata keçirilməsi təmin olunacaq. Dərnəgül bazarının da məhz bu proses çərçivəsində sökülməsi nəzərdə tutulur.