Dördayaqlıların qoxu sisteminin sirri | Alimlərdən pişiklərlə bağlı maraqlı araşdırma

Ev pişikləri sahiblərini təkcə görkəmindən deyil, xüsusi bir qoxu "radarı" ilə tanıya bilirlər.

Alimlərin fikrincə, pişiklər bunun üçün burunlarının hər iki dəliyindən fərqli şəkildə istifadə edirlər.

Tədqiqat zamanı pişiklərə tanıdıqları və tanımadıqları insanlardan götürülmüş qoxular təqdim edilib. Nəticələr göstərib ki, pişiklər tanımadıqları insanların qoxusunu daha uzun müddət iyləyir, sahiblərinin qoxusunu isə dərhal tanıya biliblər. Bu, onların qoxu yaddaşının güclü olduğunu sübut edir.

Ən maraqlısı isə budur ki, pişiklər tanış qoxuları sol burun dəliyi, yad qoxuları isə sağ dəliklə iyləyirlər. Alimlər bunu pişik beyninin məlumatı fərqli yarımkürələrdə emal etməsi ilə izah edirlər.

Mütəxəssislərin sözlərinə görə, qoxu pişiklər üçün sosial əlaqə qurmaq, təhlükəni ayırd etmək və özlərini təhlükəsizlikdə hiss etmək üçün əsas vasitədir. Ona görə də sahiblərinin qoxusu onlar üçün təhlükəsizlik və rahatlıq mənbəyidir.