Gün ərzində 20-25 maşın… | Bakının bu küçəsində təhlükəli vəziyyət

Nəsimi rayonu Salatın Əsgərova küçəsində sakinlər kanalizasiya quyusu ilə bağlı şikayətçidirlər.

Belə ki, quyulardan birinin ağzı taxta parçaları ilə örtülüb. Bu həm sürücülər, həm də piyadalar üçün təhlükə mənbəyidir.

Sakinlər hətta bu yaxınlarda “Mercedes” markalı avtomobilin həmin quyuya düşdüyünü bildiriblər:

“Daha sonra bir maşın əzildi, biz çıxartdıq. Yəni gün ərzində 20-25 maşın həmin kanalizasiya quyusuna düşür. Həmçinin qorxuruq ki, uşaqlar da quyunun içinə düşər”.

Nəsimi Rayon Sukanal İdarəsinin baş mühəndisi Hüseyn Kərimov qeyd edib ki, sözügedən hadisə təqribən 20-25 gün əvvəl də baş verib:

“Biz quyuya uyğun gələn qapaq tapdıq və quraşdırdıq. Amma görünür ki, qapağı yenə götürüblər. Həmin quyular köhnədir. Məcburuq ki, onları gövdəsi ilə birgə dəyişək. Bunun üçün də “Azəravtoyol”a müraciət etdik. Bir-iki saat ərzində həmin quyunu korpusu ilə birlikdə dəyişəcəyik”.