Güneydəki azərbaycanlılar fəryad edir

İranda zəlzələdən sonra həmyerlilərimiz fəryad edir. Güney Azərbaycanın Xoy şəhərində baş verən dağıdıcı zəlzələ nəticəsində minlərlə vətəndaş evsiz qalıb.

Hər zaman olduğu kimi, bu dəfə də molla rejimi Cənubi Azərbaycan vətəndaşlarına sahib çıxmır. Zərər çəkmiş vətəndaşlar mətbuata verdikləri açıqlamalarda yaşadıqları evlərin uçması səbəbindən şaxtalı havada köməksiz qaldıqlarından, qida çatışmazlığından, lazımi tibbi yardımın göstərilmədiyindən bəhs edib, eyni zamanda körpə uşaqların və yaşlı insanların soyuqdan əziyyət çəkdiklərini, lazımi sayda çadır verilmədiyini bildiriblər.

Bu azmış kimi, İran Qızıl Aypara Cəmiyyəti zərərçəkənlərə yardımla bağlı Türkiyənin Qızıl Aypara Cəmiyyətinin təklifini qəbul etməyib. İran tərəfi heç bir yardıma ehtiyacları olmadıqlarını qeyd edib.

Bu barədə Türkiyənin Qızıl Aypara Cəmiyyəti rəsmi tviter hesabında paylaşım edib. "Yanvarın 29-da baş verən təbii fəlakətdən sonra yaranan humanitar fəlakətin yaratdığı fəsadları İran tərəfinin aradan qaldıracağı bildirilib. Bu səbəbdən Türkiyə bu məsələdə öz dəstəyini göstərə bilmir", - deyə məlumatda bildirilib.