“Hər şeyin sübutu var” | Rəqsanənin vəkili şikayətçinin iddiaları barədə nələri açıqladı?

Bir neçə gün əvvəl dələduzluq faktına görə həbs edilən müğənni Rəqsanə İsmayılova ilə bağlı videomüraciət yayılıb.

Şikayətçi olduğunu bildirən Gündüz Məmmədov Rəqsanə İsmayılovanın və həyat yoldaşı Fazil Əmiraslanovun onu necə aldatdıqlarından danışıb:

“2022-ci ildə mənim qayınatamın miqrasiya problemləri var idi. Bu zaman Rəqsanə İsmayılova və onun həyat yoldaşı Fazil Əmiraslanov bizə müraciət edərək bu problemi həll edə biləcəklərini dedilər. Bildirdilər ki, Rusiyanın hüquq-mühafizə orqanlarında yaxın adamları var və bu adamların vasitəsilə problemi həll edəcəklər. Qayınatamın miqrasiya problemini həll etmək üçün biz onlara 520 min dollar pul verdik. Pulu şəxsən mən özüm onlara təqdim etmişəm. Pulu onlara verməyimə dair əlimdə əsaslı sübutlar da var”.

Rəqsanə İsmayılovanın vəkili Hikmət Əliyev isə Baku TV-yə açıqlamasında videomüraciət ünvanlayan şəxsin iş üzrə zərərçəkən qismində tanınmadığını bildirib.

“Bildiyim qədəri ilə həmin şəxsin adı iş üzrə şahid qismində keçir. Hər bir halda, videoda səslənən məqamları Rəqsanə xanım qəbul etmir və həqiqətə uyğun hesab etmir. Hazırda istintaq davam etdiyindən hadisənin detalları barədə açıqlama vermək istəmirəm, çünki bu, istintaq sirrinin pozulmasına səbəb ola bilər. Əminəm ki, istintaqın gedişi nəticəsində bütün məsələlər tam şəkildə aydınlaşdırılacaq və yekunda ədalətli qərar qəbul ediləcək”, ‒ deyə vəkil qeyd edib.