“İmtahandan da keçiblər, amma...” | Rus bölməsinin 1-ci sinfi bağlanır? - Baku TV

Ağdaşdan olan bir qrup valideyn Baku TV-nin qaynar xəttinə müraciət edib.

Onlar bildirirlər ki, rayonun Bəkir Nəbiyev adına 3 saylı tam orta məktəbində rus bölməsinin bağlanacağı planlaşdırılır. Hazırda rus bölməsinə qəbul olan 21 şagirdin valideyni övladlarının təhsilindən narahatdır.

Valideynlərdən biri deyib:

“Bizə bildirirlər ki, sinfiniz açılmayacaq. Ya uşaqlar başqa rayonlarda və ya şəhərlərdə oxusunlar, ya da Azərbaycan bölməsinə keçsinlər. Səbəb kimi kadr çatışmazlığı göstərirlər, amma bu, doğru deyil”.

Başqa bir valideyn əlavə edib:

“Uşaqlar bir ildir rus bölməsinə hazırlığa gəlirlər. Mayın 19-u imtahan veriblər və 21 uşaq keçib. İndi deyirlər ki, sinif açılmayacaq. Bu, uşaqların təhsil hüququnun pozulmasıdır”.

Məsələ ilə bağlı Mərkəzi Aran Regional Təhsil İdarəsindən bildirilib ki, birinci sinfə qəbul prosesi elektron sistem üzərindən aparılır:

“Sinif komplektləri yalnız qəbul prosesinin bütün mərhələləri yekunlaşdıqdan sonra formalaşdırılacaq. Müsahibə mərhələsi məktəblər tərəfindən təşkil edilən müsabiqə xarakteri daşımır. Məqsəd yalnız uşaqların seçilmiş tədris dili üzrə dil bacarıqlarının qiymətləndirilməsidir.

Müsahibədən uğurla keçən uşaqlar üçün 17 iyun tarixindən etibarən valideynlər məktəb və müəllim seçimi edə biləcəklər. Birinci sinfə qəbul prosesi sentyabr ayınadək davam edəcək. Digər dillərdə tədris aparılan bölmələr üçün də müraciət imkanı yaradılacaq. Valideynlərdən xahiş olunur ki, prosesin hər mərhələsini rəsmi tarixlərə uyğun izləsinlər və yalnız rəsmi məlumatlara əsaslansınlar”.