İşçilərin təhlükəsizliyini təmin etməyən işəgötürənlər | Qurum niyə hərəkətə keçmir?

Hər il dünyada istehsalatda baş verən qəzalar səbəbindən yüzlərlə insan əmək qabiliyyətini və ya həyatını itirir.

Bu səbəbdən onların iş geyimi və dəbilqə ilə təmin olunması mütləqdir. Lakin təəssüf ki, bir çox işəgötürən tərəfindən onların təhlükəsizliyinin təmin edilmədiyinin şahidi oluruq.

Dövlət Statistika Komitəsindən verilən məlumata görə, 2023-cü ildə istehsalatda bədbəxt hadisələr zamanı əmək qabiliyyətini itirən və ölənlərin sayı 454 nəfərdir.

Təhlükəsizlik ekspertləri bildirirlər ki, çox zaman işəgötürənlər əlavə vəsait xərcləməmək üçün işçiləri istehsalatda lazım olan vasitələrlə təmin etmirlər.

Əmək mühafizə qaydalarını pozan işəgötürənlər İnzibati Xətalar Məcəlləsinin 198-ci maddəsinə əsasən, qanun qarşısında cavabdehlik daşıyırlar.

Vəkil Mircavid Miriyev bildirib ki, həmin müəssisələr Əmək Müfəttişliyi tərəfindən 500 manatdan 1000 manatadək miqdarda cərimə edilir:

“Bu qayda pozuntusu nəticəsində ehtiyatsızlıqdan insan sağlamlığına yüngül zərər vurulması halı baş verərsə, bu zaman 1000 manatdan 1500 manata qədər məbləğdə cərimə tətbiq edilir.

Əgər nəzərdə tutulmuş əməl zərərçəkmiş şəxsin sağlamlığına az ağır zərər vurulmasına səbəb olubsa, bu zaman 1500 manatdan 2000 manatadək miqdarda cərimə tətbiq edilir. Ehtiyatsızlıqdan 2 və daha çox şəxsin ölümünə səbəb olarsa, o zaman həmin şəxslər 3 ildən 7 ilədək müddətə azadlıqdan məhrumetmə ilə cəzalandırılacaqlar”.