İstismar müddəti bitmiş binaların söküntüsünə başlanacaq | Hansı ərazilər plana düşüb? - Baku TV

“Bakı şəhəri Baş Planı – 2040” layihəsinə uyğun olaraq paytaxtın bir çox ərazilərində qəzalı və istismar müddəti bitmiş binaların söküntüsünə start verilib. Artıq yeddi rayonda bu proses başlayıb və Nəsimi, Nizami, Yasamal, Xətai, Nərimanov, Binəqədi və Pirallahı rayonlarını əhatə edəcək”.

Bu sözləri Azərbaycan Qiymətləndiricilər Cəmiyyətinin sədri Vüqar Oruc deyib.

O bildirib ki, söküntü prosesi gələcəkdə yalnız Bakı və Abşeron yarımadası ilə məhdudlaşmayacaq:

“Digər rayonların ərazilərində də müvafiq qurumlar qəzalı və istismar müddəti bitmiş binaların söküntüsünə start verəcək. Həmin binalarda yaşayan vətəndaşlara mülkiyyətlərindən imtina etdikləri halda kompensasiya ödəniləcək. Əgər ərazidə yeni binalar tikiləcəksə, vətəndaşlara həmin binalardan yeni mənzillər təklif olunacaq. Yox, əgər abadlaşdırma, park salınması və infrastruktur dəyişiklikləri aparılacaqsa, o zaman başqa ərazidə mənzil almaq üçün kompensasiya veriləcək”.

V.Oruc kompensasiyanın hesablanma qaydasına da toxunub:

“Kompensasiya müəyyən edilərkən əmlakların bazar dəyəri əsas götürülür. Bu dəyər ya müvafiq icra qurumları tərəfindən, ya da satın alma yolu ilə seçilmiş qiymətləndirmə şirkəti vasitəsilə hesablanır”.