İşxanyan və Babayanın istintaqa verdiyi gözlənilməz cavablar - Baku TV

Bakı Apellyasiya Məhkəməsində Ermənistanın Azərbaycana qarşı hərbi təcavüzü nəticəsində çoxsaylı cinayətlərə görə Bakı Hərbi Məhkəməsi tərəfindən barələrində ittiham hökmü çıxarılan Ermənistan Respublikası vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin apellyasiya şikayətləri üzrə məhkəmə baxışı keçirilib.

Məhkəmədə bildirilib ki, təqsirləndirilən Davit İşxanyanın yazılı qeydləri qanunvericiliyin tələblərinə uyğun tərcümə olunaraq iş materiallarına əlavə edilib.

Dövlət ittihamını müdafiə edən prokurorlar Cinayət-Prosessual Məcəlləsinin 51.7-ci maddəsinə istinad edərək vurğulayıblar ki, məhkəmə iclası protokoluna verilmiş qeydlər araşdırılmalı, əsaslı hesab olunarsa, təsdiqlənməli, əks halda isə rədd edilməlidir. Onlar məhkəmədən qanunvericiliyə uyğun qərar qəbul etməyi xahiş ediblər. Zərərçəkmiş şəxslərin nümayəndələri də ittiham tərəfinin mövqeyini dəstəkləyiblər.

Daha sonra təqsirləndirilən Levon Mnatsakanyan vəsatət vermək istədiyini bildirib. Məhkəməyə sədrlik edən hakim ona bunun üçün müvafiq imkan yaradılacağını deyib.

Ardınca Davit İşxanyan qəbul olunmuş qərara görə təşəkkür edib və əvvəlki mövqeyini təkrarlayaraq özünü təqsirli bilmədiyini bildirib.

David Babayanın müdafiəçisi çıxışında apellyasiya şikayətinin əsaslı olduğunu vurğulayaraq hökmün ləğv edilməsini və müvəkkili barəsində bəraət hökmünün çıxarılmasını istəyib. David Babayan da ona qarşı irəli sürülən ittihamlar üzrə özünü təqsirli bilmədiyini deyib.

Məhkəmənin növbəti iclası iyulun 7-də keçiriləcək.