“Koroğlu” stansiyasının yanında yeni nəqliyyat mübadilə mərkəzi yaradılır

Azərbaycan Yerüstü Nəqliyyat Agentliyi tərəfindən növbəti layihənin icrasına başlanılıb.

Qurumdan bildirilib ki, metronun “Koroğlu” stansiyasının cənub çıxışında nəqliyyat mübadilə məntəqəsinin yaradılması ilə bağlı layihə hazırlanıb və Nəqliyyatı Əlaqələndirmə Şurasında razılaşdırılıb.

Aparılan təhlillər göstərir ki, hazırda Bakıətrafı kənd və qəsəbələrə getmək istəyən sərnişinlər “Koroğlu” stansiyasının şimal çıxışında yerləşən mövcud avtobus dayanacaq məntəqəsinə çatmaq üçün 5-8 dəqiqə vaxt sərf edir. Bu da sərnişinlər üçün əlavə vaxt itkisidir.

Eyni zamanda stansiyanın qarşısında şəxsi maşınlarla sərnişin daşınır ki, bu da nəqliyyat sıxlığı yaradır. Bütün bunları nəzərə alaraq, sərnişinlərin ictimai nəqliyyat növləri arasında rahat keçidinin təmin olunması məqsədilə ərazidə avtobus, metro, dəmiryolu stansiyası, taksi duracağı, ictimai və fərdi nəqliyyat qovşağını əlaqələndirəcək multimodal habın yaradılmasına başlanılıb.

Beləliklə, görüləcək işlər çərçivəsində stansiyanın cənub çıxışında, yəni Milli Gimnastika Arenasının qarşısında dəmiryolu stansiyasına yaxın 3 perronlu avtobus dayanacağı yaradılacaq, həmçinin minik avtomobilləri üçün “park and ride” tipli parklanma yerləri təşkil ediləcək.

Bundan başqa, taksi minik avtomobilləri üçün yolun hərəkət hissəsinə yaxın duracaq yaradılacaq və elektrik mühərrikli avtobuslar üçün doldurma məntəqələri quraşdırılacaq.