Koronavirus xəstələrinin artacağı ilə bağlı xəbərdarlıq

2023-cü ilin mayında Ümumdünya Səhiyyə Təşkilatı COVID-19 pandemiyasının başa çatdığını elan edib.

Amma bu o demək deyil ki, təhlükə keçib. Üç ildən artıqdır davam edən koronavirus pandemiyası qlobal səhiyyə sistemi üçün ciddi sınaq olub. İndiyədək azı 20 milyon insanın öldüyü təxmin edilir. Rəsmi rəqəmlər isə bu sayın 7 milyon olduğunu göstərir.

Azərbaycanda isə dövlətin həyata keçirdiyi tədbirlər nəticəsində vəziyyət dərhal nəzarətə götürülüb, xəstəliyin profilaktikası, insanların təhlükəsizliyinin təmin edilməsi, müalicəsi istiqamətində əsaslı addımlar atılıb. Bu dövr ərzində Azərbaycanda 830 mindən artıq şəxs koronavirusa yoluxub, 10 mindən artıq şəxs vəfat edib, 800 mindən çox insan isə müalicə alaraq sağalıb.

Koronavirus daim mutasiyaya uğrayır və yeni ştamların ortaya çıxması dünya əhalisini narahat edir. Bu ilin fevral ayında yüksək paylanma effektivliyi ilə EG.5 növü olan “Eris” qeydə alınıb. Bu, “Omikron” ştamının yeni versiyasıdır. Simptomlar klassikdir: öskürək, burun axması, boğaz ağrısı, qızdırma, şiddətli yorğunluq.

Əvvəlki aylarla müqayisədə xəstəxanaya yerləşdirilən xəstələrin sayı bir qədər artıb. Payız mövsümündə virus infeksiyalarında artım gözlənilir və buna uyğun olaraq koronaviruslu xəstələrin sayı bir qədər də artacaq.

Ümumdünya Səhiyyə Təşkilatı son bir ayda dünyada COVID-19-a yoluxma hallarının 63% artdığını bildirib. İyulun 17-dən avqustun 13-dək 1,4 milyon insan bu virusa yoluxub. Hətta ABŞ-nin bəzi ştatlarında məcburi maska rejiminin tətbiqinə başlanılıb.

EG.5 variant infeksiyalarında artım əsasən ABŞ, Avropa və Qərbi Sakit Okean regionunda müşahidə olunur. ÜST nümayəndələri bu tendensiyanın davam edəcəyini proqnozlaşdırırlar.

Koronavirusla bağlı vəziyyət Azərbaycan Səhiyyə Nazirliyi və digər aidiyyəti dövlət qurumlarının da daim diqqət mərkəzindədir.