Kredit faizləri artır, depozit faizləri isə... | Bu fərq niyə yaranır? - Baku TV

Bankların yeni cəlb etdikləri depozitlərin faizi azalsa da, kreditlərin faizləri nəinki azalmayıb, əksinə artıb.

Belə ki, Mərkəzi Bankın 2025-ci ilin dekabrın 1-nə olan məlumatına görə, manatla olan depozitlərin orta faiz göstəricisi 8,71-dən 6,77-ə enib. Kreditlərin faizləri isə 17,07-dən 18,68-ə yüksəlib. Bu vəziyyət xarici valyutada olan depozit və kreditləri də əhatə edir.

Maraqlıdır, bankların cəlb etdikləri vəsaitlərin ucuzlaşmasına baxmayaraq, verilən kreditlərin faizlərinin artması nə ilə bağlıdır?

Rəsmi göstəricilərə görə, verilmiş kreditlərin 46,8 faizini istehlak və ipoteka kreditləri təşkil edir. Mərkəzi Bankın məlumatına görə, istehlak kreditlərinin orta faizləri kreditin növündən asılı olaraq 13 faizdən 26 faizədək dəyişir.

İqtisadçı Eldəniz Əmirov kredit faizləri ilə yanaşı, depozit faizlərinin də mövcud iqtisadi sistemdəki risk amilləri əsasında formalaşdığını deyir:

“Ötən illə müqayisədə bu gün depozit faizlərinin aşağı düşməsi növbəti 2, 3 il müddətinə olan proqnozlarla bağlı risklərin yüksək olması faktından qaynaqlanır. Amma bunun qarşılığında 17-18 faizlik kredit göstəriciləri böyük marjadır. Banklar tərəfindən bu tip fərqin ortaya qoyulması həddindən artıq böyük göstəricidir”.

Hazırda bankların depozit faizlərinə nəzər salanda məlum olur ki, onlar 2026-cı ildə azalmaqda davam edir. Belə ki, son bir ay ərzində bir neçə bank cəlb etdikləri vəsaitlər üzrə faizləri 0,5 faiz-bənd azaldıblar.